[...Pyetje dhe përgjigje rreth agjërimit...]

67. NGRËNIA ME HARRESË GJATË RAMAZANIT
68. MENSTRUACIONET DHE AGJËRIMI
69. DALJA E PIKAVE TË GJAKUT
70. LARJA PAS AGIMIT
71. ARDHJA E MENSTRUACIONEVE DHE AGJËRIMI
72. GJAKU I MENSTRUACIONEVE
73. NGRËNIA GJATË NAMAZIT
74. FUNDI I MENSTRUACIONEVE
75. VONIMI I AGJËRIMIT TË DITËVE TË LËNA GJATË RAMAZANIT

Pyetje: Ç'duhet të bëjë ai person që ha, pi apo kryen marrëdhëne seksuale me harresë gjatë agjërimit?

Përgjigje: Agjërimi, pavarësisht nëse është farz apo sunet, nuk prishet nëse dikush ha dhe pi me harresë, sepse Pejgamberi [sal-lall-llahu alejhi ve sel-lem] ka thënë për këtë rast "Atë e ka ushqyer All-llahu".

Ndërsa, sa u përket marrëdhënieve seksuale, unë nuk mund ta paramendoj se si mund të harrojnë të dy bashkëshortët njëherësh, por nëse ndodh me të vërtetë, atëherë agjërimi i tyre është i plotë. Nëse njëri prej bashkëshortëve harron, ndërsa tjetri shfrytëzon harresën e tij, atëherë agjërimi i atij që harron është i plotë, ndërsa tjetri duhet të bëjë shlyerjen e madhe.

68. MENSTRUACIONET DHE AGJËRIMI

Pyetje: Nëse menstruacionet përsëriten menjëherë pas agimit d.m.th. pas hyrjes së kohës së namazit të sabahut, a duhet ta agjërojë atë ditë? Nëse e agjëroj, a është i plotë agjërimi im, apo duhet të agjëroj një herë tjetër?

Përgjigje: Dijetarët kanë rënë dakord që, në këtë rast, gruaja duhet të agjërojë një ditë tjetër për të zëvendësuar agjërimin e asaj dite. Ndërsa, sa i përket agjërimit të pjesës së mbetur të ditës, ata kanë shfaqur dy mendime të ndryshme:

1- Sipas mendimit të parë, gruaja duhet të agjërojë pjesën e mbetur të ditës dhe në të njëjtën kohë duhet ta kompenzojë një herë tjetër agjërimin e asaj dite.

2- Sipas mendimit të dytë, ajo nuk duhet ta agjërojë pjesën e mbetur të asaj dite, sepse agjërimi i saj nuk është i plotë, nga fakti se në kohën e fillimit të agjërimit ajo nuk e ka pasur për detyrë agjërimin e asaj dite. Meqenëse agjërimi i saj nuk është i pranuar, atëherë vazhdimi i tij gjatë pjesës së mbetur të ditës është i pakuptimtë, sepse në fillimin e kohës ajo e kishte të ndaluar atë dhe në të njëjtën kohë dihet fare mirë se përkufizimi i agjërimit në aspektin fetar është: "Lënia (për hir të All-llahut) e ushqimeve, pijeve dhe marrëdhënieve seksuale nga agimi i ditës, deri në perëndimin e diellit".

Siç shihet, mendimi i dytë është më i saktë se i pari.

Ibën Uthejmini

69. DALJA E PIKAVE TË GJAKUT

Pyetje: A është i plotë agjërimi i asaj gruaje, nga e cila rrjedhin sasi të vogla pikash gjaku, gjatë gjithë muajit të Ramazanit?

Përgjigje: Agjërimi i saj është më se i plotë, pasi këto pika gjaku nuk janë prej gjakut të menstruacioneve, por dalin prej enëve të gjakut.

Sipas disa transmetimeve të sakta, kur për këtë u pyet Ali ibën Ebi Talib,tha se rrjedhja e gjakut në këtë mënyrë është e ngjashme me rrjedhjen e gjakut nga hundët, d.m.th. ky gjak nuk është prej menstruacioneve.

Ibën Uthejmini

70. LARJA PAS AGIMIT

Pyetje: Nëse menstruacionet apo lehonia ndërpriten para agimit, d.m.th. para se të hyjë koha e namazit të sabahut, por gruaja nuk ka mundësi të lahet, pos pas agimit, a është i plotë agjërimi i saj?

Përgjigje: Agjërimi i saj, në të dyja rastet, është i plotë, sepse rasti i saj është i ngjashëm me rastin e xhunubit, të cilin mund ta zërë ezani i sabahut pa u larë akoma. All-llahu [subhanehu ve teala] thotë: "E tani mund të kryeni marrëdhënie seksuale me gratë tuaja (gjatë netëve të Ramazanit) dhe kërkoni atë që ka caktuar All-llahu për ju. Hani e pini deri sa të dallohet peni i bardhë (drita e mëngjesit) nga ai i ziu (errësira e natës) në agim". (El-Bekare: 187)

Pra, përderisa marrëdhëniet seksuale janë të lejuara deri në agim, sigurisht që larja mund të bëhet vetëm pas agimit, d.m.th. pasi të hyjë koha e namazit të sabahut.

Po ashtu, Aishja thotë: "Pejgamberi [sal-lall-llahu alejhi ve sel-lem] gdhihej xhunub dhe agjëronte". Pra, Pejgamberi [sal-lall-llahu alejhi ve sel-lem] lahej pas hyrjes së kohës së namazit të sabahut.

Ibën Uthejmini

71. ARDHJA E MENSTRUACIONEVE DHE AGJËRIMI

Pyetje: Nëse gruaja ndjen ardhjen e menstruacioneve, apo dhembjet e zakonshme pak para perëndimit të diellit, mirëpo rrjedhja e gjakut fillon pas perëndimit të tij, a është i plotë agjërimi i saj?

Përgjigje: Nëse rrjedhja e gjakut fillon pas perëndimit të diellit, atëherë agjërimi i saj është i plotë, pavarësisht nëse shenjat e ardhjes së menstruacioneve apo dhembjet e zakonshme të tyre fillojnë para perëndimit.

Ibën Uthejmini

72. GJAKU I MENSTRUACIONEVE

Pyetje: Nëse gruaja sheh se është duke i rrjedhur pak gjak, por nuk është e sigurt nëse është gjak menstruacionesh, apo jo, a është i plotë agjërimi i saj?

Përgjigje: Agjërimi i saj është i plotë, sepse ajo konsiderohet e pastër derisa të sigurohet plotësisht se gjaku i dalë është i menstruacioneve.

Ibën Uthejmini

73. NGRËNIA GJATË RAMAZANIT

Pyetje: A i lejohet gruas me menstruacione apo lehonës që të hajë e të pijë gjatë muajit të Ramazanit?

Përgjigje: Asaj i lejohet që të hajë e të pijë lirisht, por në të njëjtën kohë duhet të ruhet që të mos e shohin fëmijët e vegjël, sepse ata nuk e kuptojnë këtë gjë dhe mund të mendojnë se ajo po e prish agjërimin pa asnjë shkak.

Ibën Uthejmini

74. FUNDI I MENSTRUACIONEVE

Pyetje: A duhet të agjërojë gruaja, nëse në ditët e fundit të menstruacioneve të saj, para pastrimit, nuk është shfaqur akoma shenja e pastrimit, sekrecioni i bardhë?

Përgjigje: Ky sekrecion nuk shfaqet te të gjitha gratë, andaj ato gra që nuk e kanë zakon ta shohin sekrecionin e bardhë, duhet të agjërojnë. Ndërsa ato gra, te të cilat dalja e sekrecionit të bardhë është prej zakonit të tyre, nuk duhet të agjërojnë derisa ta shohin atë.

Ibën Uthejmini

75. VONIMI I AGJËRIMIT TË DITËVE TË LËNA GJATË RAMAZANIT

Pyetje: Ç'duhet të bëjnë ato gra, të cilat i zë Ramazani pa plotësuar akoma agjërimin e ditëve të lëna nga Ramazani i kaluar?

Përgjigje: Këto gra duhet të pendohen sinqerisht për këtë vepër dhe të kërkojnë falje nga All-llahu [subhanehu ve teala], sepse vonimi pa arsye i zëvendësimit të ditëve të lëna, deri në ardhjen e Ramazanit tjetër, është kategorikisht i ndaluar. Aishja, e shoqja e Pejgamberit [sal-lall-llahu alejhi ve sel-lem], thotë:

"Në disa raste, nuk kam pasur mundësi që t'i agjëroja ditët e lëna nga Ramazani, përveçse në Shaban".

Sidoqoftë, ato duhet t'i zëvendësojnë ditët e lëna nga Ramazani i parë, menjëherë pas mbarimit të Ramazanit të dytë.

Ibën Uthejmini