Falënderimi i takon vetëm Allahut (Subhanehu ue Teala), Atë e falënderojmë dhe vetëm nga Ai ndihmë, falje dhe udhëzim kërkojmë, kërkojmë mbrojtje nga Allahu (Subhanehu ue Teala) për veprat tona të këqija, Atë që Allahu e udhëzon s’ka kush që e humb, dhe atë që Allahu në rrugë të keqe e lenë, s’ka kush që mundet në rrugë të drejtë ta drejtojë. Deklaroj se nuk ka Zot tjetër që e meriton adhurimin përveç Allahut, i Cili nuk ka shok, dhe deklaroj se Muhamedi (SalAllahu alejhi ue selem) është i Dërguar dhe rob i Tij.

Më pas:
Me të vërtetë Allahu (Subhanehu ue Teala) na ka obliguar (na ka bërë farz) disa gjëra të cilat nuk lejohet që mos ti veprojmë, dhe ka vendosur kufij që nuk lejohet ti tejkalojmë, dhe na i ka ndaluar disa gjëra të cilat nuk na lejohet ti veprojmë.

Pejgamberi (SalAllahu alejhi ue selem) ka thënë:
"Ate çka Allahu (Subhanehu ue Teala) e ka lejuar në librin e Tij (Kur'an) ajo është e lejuar (hallall), dhe ate çka e ka ndaluar është e ndaluar, kurse për ato gjëra që ka heshtur, është falje për ju dhe pranojeni faljen nga Allahu (Subhanehu ue Teala) sepse Allahu (Subhanehu ue Teala) nuk harron."
...pastaj lexoi ajetin ku Allahu (Subhanehu ue Teala) thotë:
"...e Zoti yt nuk është që harron."[Merjem, 64]
[Transmeton Hakimi 375/2, Shejh Albani ka thënë se hadithi është Hasen, shih Gajetul Meram f.14]

Kurse haramet (gjërat e ndaluara) janë kufijtë të cilat i ka vendosur Allahu (Subhanehu ue Teala). Allahu (Subhanehu ue Teala) thotë:
"Dhe këta janë kufijtë e përcaktuar të Allahut dhe kushdo që i kalon kufijtë e përcaktuar të Allahut, atëherë me të vërtetë që ai e ka dëmtuar veten."
[Et-Talak, 1]

Allahu (Subhanehu ue Teala) iu është kërcënuar atyre që i kalojnë kufijtë e Tij dhe nuk i respektojnë ndalesat e Tij. Allahu (Subhanehu ue Teala) ka thënë:
"Dhe kushdo që nuk i bindet Allahut dhe të Dërguarit të Tij dhe i kalon kufijtë e Tij, (atëherë) Ai do ta flakë atë në Zjarr për të banuar atje dhe për të do të ketë ndëshkim poshtërues."
[En-Nisa, 14]

Largimi nga haramet është obligim i çdo besimtari. Pejgamberi (SalAllahu alejhi ue selem) ka thënë:
"Atë çka u'a kam ndaluar juve largojuni atyre, kurse ate çka ju kam urdhëruar, veproni çka të keni mundësi."
[Transmeton Muslimi, hadithi nr.130]

Disa të cilët i pasojnë epshet e tyre, të cilët kanë dituri shumë të cekët dhe iman të dobët, kur të dëgjojnë për haramet (ndalesat) nervozohet dhe thonë: çdo gjë qenka haram, nuk latë asgjë e që nuk e ndaluat, na keni lodhur shpirtin tonë, nga keni ngushtuar jetën tonë, dhe ju nuk dini tjetër gjë vetëm të thoni: e ndaluar, e ndaluar; feja është tolerancë dhe Allahu (Subhanehu ue Teala) është i mëshirshëm.

Pohimeve të këtyre personave i themi:

Allahu (Subhanehu ue Teala) gjykon si të do dhe askush nuk ka të drejt ta korrigjoj Atë, dhe Ai është i Urti i Gjithëdijshmi, Ai lejon çka të do dhe ndalon çka të do, dhe prej kushteve të adhurimit tonë ndaj Allahut (Subhanehu ue Teala) është që ti dorëzohemi çdo gjykimi të Allahut (Subhanehu ue Teala) dhe të jemi të kënaqur me atë gjykim.

Çdo gjykim Allahu (Subhanehu ue Teala) e ka vendosur me diturinë, mençurinë, urtësinë dhe drejtësinë e Tij, siç ka thënë Allahu (Subhanehu ue Teala):
"Fjalët e Zotit tënd janë plot të vërteta (çka lajmërojnë) dhe plot të drejta (çka gjykojnë). S’ka kush që të ndryshojë fjalët (vendimet) e Tij. Ai është që dëgjon e di."
[El-En'am, 115]

Gjithashtu, Allahu (Subhanehu ue Teala) na ka treguar rregullat e Tij se si i lejon dhe si i ndalon gjërat, ku thotë:
"..ai u lejon atyre si të ligjshme At-Tajjibat (gjithçka të mirë dhe të ligjshme për besimin, punët, njerëzit, ushqimet, sendet) dhe ua ndalon si të paligjshme Al-Khabaith (gjithçka të keqe dhe të palejueshme për besimin, punët, njerëzit, ushqimet).."
[El-A'raf, 157]

Lejimi apo ndalimi i gjërave është kompetencë vetëm e Allahut (Subhanehu ue Teala), dhe çdo kush i cili ia jep vetës apo të tjerëve këtë të drejtë (për lejim apo për ndalim) është qafir (pabesimtar), i dalur nga feja e Allahut (Subhanehu ue Teala). Allahu (Subhanehu ue Teala) thotë:
"Apo kanë ata shokë e të barabartë me Allahun (zota të rremë të tyre) të cilët kanë themeluar e përcaktuar për ta ndonjë fe të cilën nuk e ka urdhëruar e përcaktuar Allahu?"
[Esh-Shura, 21]

Pastaj, nuk i lejohet askujt që të flet për hallallin dhe haramin përveç ata që kanë dituri dhe njohuri për Kur'anin dhe Sunetin e Pejgamberit (SalAllahu alejhi ue selem). Allahu (Subhanehu ue Teala) u është kërcënuar atyre që i lejojnë apo ndalojnë gjërat pa dituri. Allahu (Subhanehu ue Teala) thotë:
"Por mos thoni në lidhje me atë që jua thotë goja duke gënjyer: “Kjo është e ligjshme dhe kjo është e ndaluar”, që të shpifni gënjeshtër ndaj Allahut, (pasi) me të vërtetë ata të cilët shpifin gënjeshtra ndaj Allahut, nuk kanë shpëtim."
[En-Nahl, 116]

Haramet (ndalesat) janë të cekura në Kur’an dhe sunnet (hadithe), si p.sh fjala e Allahut (Subhanehu ue Teala) ku thotë:
"Thuaj: “Ejani t’ju lexoj atë që me të vërtetë ju ndaloi Zoti juaj: të mos i shoqëroni Atij asnjë send, të silleni mirë me prindërit, të mos i mbytni fëmijët tuaj për shkak të varfërisë, sepse Ne u ushqejmë juve dhe ata, të mos u afroheni mëkateve të hapta apo të fshehta, mos e mbytni njeriun sepse mbytjen e tij e ndaloi All-llahu, përpos kur është me vend. Këto janë porositë e Tij, kështu që të mendoni thellë."
[El-En'am, 151]

Gjithashtu, edhe në hadithe janë të cekura shumë ndalesa (harame), si hadithi ku Pejgamberi (SalAllahu alejhi ue selem) thotë:
"Me të vërtetë Allahu (Subhanehu ue Teala) ka ndaluar shitjen e alkoolit, ngordhësirës, derrit dhe idhujve."
[Transmeton Ebu Davudi 3486, dhe gjithashtu është në Sahihun e Ebu Davudit, 977]

Pejgamberi (SalAllahu alejhi ue selem) thotë:
"Kur Allahu (Subhanehu ue Teala) e ndalon ndonjë send, e ndalon edhe shitjen e tij."
[Transmeton Darekutni 7/3 dhe hadithi është Sahih]

Ndonjëherë disa ajete i cekin ndalesat (haramet) që i përkasin një lloji, si për shembull ndalesat e ushqimeve, ku Allahu (Subhanehu ue Teala) thotë:
"Juve u janë ndaluar (t’i hani): ngordhësirat, gjaku, mishi i derrit, ajo që theret jo në emrin e All-llahut, e furmja, e mbytura, e rrëzuarja, e shpuarja (nga briri i tjetrës), ajo që e ka ngrënë egërsira, përveç asaj që arrini ta therrni (para se të ngordhë), ajo që është therrur për idhuj…"
[El-Maideh, 3]

Pastaj Allahu (Subhanehu ue Teala) i ka cekur ndalesat (haramet) të llojit të martesës ku thotë:
"U janë ndaluar juve (të martoheni me): nënat tuaja, bijat tuaja, motrat tuaja, hallat tuaja, tezet tuaja, bijat e vëllaut, bijat e motrës, nënat tuaja që ju kanë dhënë gji, motrat nga gjiri, nënat e grave tuaja (vjehrrat) dhe vajzat që janë nën kujdesin tuaj e të lindura (prej tjetër babai) nga gratë tuaja me të cilat patët kontakt, e nëse nuk ken pasur kontakt me to (me gratë), atëherë s’ka pengesë (të martoheni me ato vajza), dhe (janë të ndaluara) gratë e bijve tuaj që janë të lindjes suaj (jo të bijëve të adoptuar), dhe të bashkoni (përnjeherë në një niqah) dy motra, përpos asaj që ka kaluar."
[En-Nisa, 23]

Gjithashtu, ka cekur ndalesat nga fitimet ku thotë:
"E All-llahu e ka lejuar shitblerjen, por e ka ndaluar kamatën."
[El-Bekare, 275]

Megjithatë, Allahu (Subhanehu ue Teala) është i mëshirshëm ndaj robërve të Tij. Na ka lejuar neve shumë gjëra të llojeve të ndryshme të cilat nuk kemi mundësi as ti numërojmë. Për këtë shkak, Allahu (Subhanehu ue Teala) nuk i ka cekur (në Kur’an apo hadithe) gjërat e lejuara sepse ato janë të shumta dhe nuk mund të numërohen, pori ka cekur gjërat e ndaluara të cilat janë të kufizuara dhe që ti dimë ato dhe të ju largohemi atyre. Allahu (Subhanehu ue Teala) thotë:
"..e Ai ju sqaroi juve se çka është e ndaluar për ju, përveç kur jeni detyruar (kur nuk keni tjetër gjë)?"
[El-En'am, 119]

Kurse hallallin e ka lejuar në përgjithësi, me kusht që të jetë e mirë dhe jo e dëmshme. Allahu (Subhanehu ue Teala) thotë:
"O ju njerëz, hani nga ajo që është në tokë e që është e lejuar dhe e mirë, e mos shkoni hapave të djallit se ai është armik i hapët i juaji."
[El-Bekare, 168]

Dhe prej mëshirës së Allahut (Subhanehu ue Teala) është se e ka bërë esencën e gjërave hallall (të lejuar), derisa të vijë ndonjë argument e ta ndaloj atë, dhe kjo është nga mirësia e Tij (Subhanehu ue Teala), dhe zgjerim për robin e Tij, kurse ne duhet ti nënshtrohemi Allahut (Subhanehu ue Teala) dhe ta falënderojmë Atë.

Disa njerëz, nëse ua numëron dhe sqaron haramet ju ngushtohen gjokset e tyre nga të lodhurit prej ligjeve të Allahut (Subhanehu ue Teala), dhe kjo është për shkak të imanit të tij të dobët dhe moskuptimit të drejt të sheriatit (ligjit islam). A mos dëshirojnë këta njerëz që t´u numërohen atyre gjërat e lejuara kështu që të binden se feja e Allahut (Subhanehu ue Teala) është lehtësim? Dhe a dëshirojnë që t´u numërohen atyre llojet e gjërave të mira e tu qetësohen zemrat e tyre dhe të binden se ligjet e Allahut nuk ua kanë ngushtuar jetën atyre?

A dëshirojnë që t´u tregohet atyre se u lejohet ngrënia e mishit të të therurave nga devet, lopët, delet, leprinjtë, kapronjtë, cjapat, pulat, pëllumbat, rosat, patat, apo t´u tregohet atyre se u lejohet t´i hanë ngordhësirat e peshqve dhe karkalecave?

Dhe t´u tregohet atyre se u janë lejuar atyre: pemët, perimet, fasulet, dhe të vjelurat dhe të korrurat tjera të mira dhe të dobishme. Gjithashtu, t´u tregohet se u është lejuar atyre: uji, qumështi, mjalta, vaji dhe uthulla.
Apo se kripa, erëza dhe piperi u është lejuar?

Dhe t´u tregohet se u është lejuar atyre përdorimi i: drurit, hekurit, dheut, shkopit, plastikës, xhamit dhe kauçukut.
Pastaj, u lejohet atyre hipja e kafshëve, veturave, trenave, anijeve, apo aeroplanëve.

Gjithashtu, t´u tregohet se u lejohet përdorimi i: kondicionerëve të ajrit, frigoriferëve, valtriqes, mullirit, furrave, mjeteve për bluarjen e mishit, mjeteve për përgatitjen e lëngjeve, dhe mjeteve tjera të mjekësisë, inxhinierisë, llogaritjes, kamerave, astronomisë, ndërtimtarisë, pastrimit të ujit, apo mjeteve për nxjerrjen e naftës, mineraleve, apo mjetet për pastrim, për prodhimin e ëmbëlsirave, për botimin e librave, apo përdorimi i kompjuterëve, etj.

Apo, veshja e rrobave prej pambukut, leshit, lëkurës (te kafshëve të lejuara), najlonit, etj., gjithashtu u është e lejuar.

Dhe esenca e çështjeve të martesës, shitblerjes, garancioneve (dorëzanisë), transferimit, qirasë, zanatit, tregtisë, farkëtarisë, rregullimi i makinave apo gjërave elektronike, përkujdesja e bagëtive, etj., të gjitha këto në esencë janë të lejuara.

A mendon, o njeri, se kur do të përfundonim sikur të vazhdonim në numërimin dhe renditjen e gjërave të lejuara. Çfarë kanë këta njerëz që nuk arrijnë të kuptojnë asnjë fjalë?

Kurse, sa i përket argumentimit të tyre se feja është lehtësim, është e vërtetë mirëpo me këtë kanë pasur për qëllim të pavërtetën dhe mashtrimet e tyre.
Kuptimi i lehtësimit në këtë fe nuk është lehtësim sipas epsheve të njerëzimit dhe mendimeve të tyre, mirëpo lehtësimi është sipas asaj me çka ka ardhur Kur’ani dhe sunneti.

Ka dallim shumë të madh në mes të praktikimit të harameve (ndalesave) me argumentimin e pavlefshëm se feja islame është lehtësim (dhe feja islame është lehtësim pa dyshim) dhe në mes të marrjes së lehtësimeve të cilat i ka lehtësuar Allahu (Subhanehu ue Teala) si p.sh bashkimi i namazeve dhe shkurtimi i tyre nëse njeriu është udhëtar, apo mos agjërimi gjatë udhëtimit. Gjithashtu, lehtësim është dhënia mes'h mesteve apo çorapëve për vendasin një ditë e një natë (24 orë), kurse për udhëtarin 3 ditë dhe tri netë (72 orë), apo marrja e tejemumit nëse ekziston frika nga përdorimi i ujit, ose bashkimi i namazeve për të sëmurin apo kur të bie shi i madh. Gjithashtu, lejohet të shikohet femra e huaj nëse e ke për qëllim ta martosh atë, apo të zgjedhësh nëse je përbetuar në Allahun se do ta kryesh një detyrë dhe nuk e ke kryer.

Allahu (Subhanehu ue Teala) ju ka lehtësuar besimtarëve dhe i ka bërë që të zgjedhin në mes të: lirimit të robit, ushqimit të dhjetë të varfërve ose veshmbathjen e tyre.
Gjithashtu, Allahu (Subhanehu ue Teala) u ka lejuar besimtarëve që në gjendje të jashtëzakonshme të mungesës së ushqimit ta hanë mishin e ngordhësirës (edhepse ajo është haram), dhe shumë e shumë lehtësime të tjera që i ka parashikuar ligji islam.

Duhet ta ketë parasysh çdo musliman se atë çka e ka ndaluar Allahu (Subhanehu ue Teala) apo Pejgamberi (SalAllahu alejhi ue selem), ka urtësi. Prej tyre:

1. Allahu (Subhanehu ue Teala) i sprovon robërit e Tij me gjërat e ndaluara dhe shikon se si veprojnë ata.
2. Me këtë dallohen banorët e Xhennetit nga banorët e Xhehennemit, sepse banorët e Xhehennemit janë zhytur në epshet e tyre për të cilat do të ndëshkohen, kurse banorët e Xhennetit kanë bërë durim nga ndalesat për të cilin do të shpërblehen, dhe sikur mos të ishte kjo sprovë nuk do të dallohej mëkatari nga i devotshmi dhe ai i cili me përpikëri i kryen urdhrat e Allahut. Besimtarët (me iman të plotë) vështirësitë e obligimeve i shikojnë me syrin e shpresës, duke shpresuar shpërblimin e Allahut (Subhanehu ue Teala) dhe duke ju nënshtruar urdhrave të Allahut (Subhanehu ue Teala), kështu që ta arrijnë kënaqësinë e Allahut (Subhanehu ue Teala) ndaj tyre, dhe atyre u lehtësohen vështirësitë. Kurse hipokritët, vështirësitë i shikojnë me syrin e dhimbjeve dhe vuajtjeve, kështu që nxitja e tyre kah mëkatet është e madhe dhe respektimi i urdhrave të Allahut do të jetë e vështirë.

Ai i cili i largohet harameve (ndalesave) do ta shijon ëmbëlsirën apo kënaqësinë e imanit; dhe ai i cili largohet nga haramet për hir të Allahut, Allahu (Subhanehu ue Teala) do të ja zëvendësojë atë me diç më të mirë se ajo dhe do ta shijojë kënaqësinë e imanit në zemrën e tij.